प्रहारन्युज डेक्स

पार्टी एकता : दुवै दलको बैठक सङ्गै बस्दै संजोक या संयोग

पार्टी एकताका विषयमा छलफल गर्न  नेकपा एमाले र माओवादी केन्द्रले आकस्मिक रुपमा आ–आफ्नो पार्टीका बैठक बोलाएका छन् ।

एमाले अध्यक्ष एवं प्रधानमन्त्री केपी शर्मा ओली र माओवादी केन्द्रका अध्यक्ष पुष्पकमल दाहाल प्रचण्डबीच बुधबार बिहान छलफल भएलगत्तै दुबै दलले आफ्नो पार्टीका बैठक बोलाएका हुन् ।

एमाले स्थायी कमिटिको बैठक दिउँसो ४ बजे प्रधानमन्त्री निवास बालुवाटारमा र माओवादी केन्द्रको पार्टी हेडक्वाटरको बैठक पनि ४ बजे नै प्रचण्ड निवास खुमलटारमा बोलाइएको हो ।

स्थायी कमिटि बैठक पछि एमालेले शुक्रबार बिहान १० बजे केन्द्रीय समिति बैठक पनि बोलाएको छ । पछिल्लो समय दुई पार्टीको एकता प्रक्रिया टाढिन लागेको विष्लेषण गरिएको थियो । तर आज दुई अध्यक्षबीच भएको वार्ता सकारात्मक भएपछि पार्टीलाई जानकारी गराउन बैठक बोलाइएको हो । दुई अध्यक्षको बैठकले भोली बिहीबार बिहान १० बजे एकता संयोजन समितिको बैठक बोलाएको समाचार दैनिकले उल्लेख गरेको छ ।

सम्भवत भोलि नै एकता घोषणा हुनेछ ।

भोलि मदन भण्डारी स्मृति दिवस हो । एमालेका तत्कालीन महासचिव भण्डारीको दासढुंगामा भएको सवारी दुर्घटनामा निधन भएको थियो । मदन भण्डारी स्मृति दिवसको अवसरमा एमालेले कार्यक्रम गर्दैछ, जसमा माओवादी शीर्ष नेताहरुलाई बोलाइएको छ ।

लगतै पार्टी एकता संयोजन समितिको बैठक बस्नेछ ।

बैठकपछि पत्रकार सम्मेलन गरेर पार्टी एकता भएको घोषणा हुन सक्ने माओवादी उच्च स्रोतले बताएको छ ।

भोलि नै एकीकृत पार्टी ‘नेकपा कम्युनिष्ट पार्टी’ निर्वाचन आयोगमा दर्ता गर्ने दुई दलको तयारी छ ।

© Copyright 2015-2018 Upama Sanchar P. LTD. All Right Reserved | Site by: SobizTrend Technology