प्रहारन्युज डेक्स

‘गुन्डानाइके’ गणेश लामा दोषी प्रमाणित, एक वर्षको जेल सजाय

काठमाडौं– ‘गुन्डानाइके’को उपमा पाएका काभ्रेका गणेश लामा सम्पत्ति शुद्धीकरण मुद्दामा दोषी प्रमाणित भएका छन् ।

बिहीबार विशेष अदालतले लामालाई एक वर्ष कैद र एक करोड ४० लाख ५० हजार रुपैयाँ जफत गर्ने फैसला गरेको हो ।

विशेष अदालतका अध्यक्ष बाबुराम रेग्मी, न्यायाधीशहरु द्वारिकामान जोशी र रत्नबहादुर बागचन्दको इजलासले यस्तो फैसला सुनाएको हो ।

सम्पत्ति शुद्धीकरण विभागले नेपाली कांग्रेसबाट काभ्रे प्रदेशसभा क्षेत्र नम्बर–१ को ‘ख’का उम्मेदवार बनेका लामासँग रहेको २७ करोड एक लाख रुपैयाँको स्रोत नखुलेको भन्दै मुद्दा दायर गरेको थियो ।

सम्पत्ति शुद्धीकरण विभागले २०७० जेठ ६ गते लामासहित गुन्डानाइकेहरु परशुराम बस्नेत, अभिषेक गिरी, दीपक मनाङे र चक्रे मिलनविरुद्ध मुद्दा दायर गरेको थियो ।

तीमध्ये लामा हातहतियार तथा खरखजानासम्बन्धी मुद्दामा अहिलेपनि डिल्लीबजार कारागारमा छन् । उनी काठमाडौंको गौशलाबाट पेस्तोलसहित पक्राउ परेका थिए ।

लामा तत्कालीन मधेसी जनअधिकार फोरम लोकतान्त्रिकको केन्द्रीय सदस्यसमेत बनेका थिए ।

© Copyright 2015-2018 Upama Sanchar P. LTD. All Right Reserved | Site by: SobizTrend Technology