नैनसिंह महरले प्रज्ञा प्रतिष्ठानबाट खोले स्वतन्त्रहरू सलबलाउनुको रहस्य

नैनसिंह महरले प्रज्ञा प्रतिष्ठानबाट खोले स्वतन्त्रहरू सलबलाउनुको रहस्य


प्रहार न्युज
  • बिहिबार, असार ९ २०७९

  • काठमाडौँ – नेपाली कांग्रेसका केन्द्रीय सदस्य नैनसिंह महरले राजनीतिलाई मजाकको रुपमा लिएर लहडमा आएका स्वतन्त्रहरुबारे रहस्य खोलेका छन् । नेता महरले राजधानीमा बिहीबार आयोजित आगामी निर्वाचनमा भ्रातृ संस्थाको भूमिका विषयक अन्तरक्रिया कार्यक्रममा महरले स्वतन्त्रहरुबारे प्रतिक्रिया दिएका हुन् ।

    तत्काल पार्टीका भ्रातृ संगठनलाई पूर्णता दिन आग्रह गर्दै नेता महरले भ्रातृ संगठनले पूर्णता नपाउँदा पार्टी र संगठनका लागि काम गर्ने कार्यकर्ताहरूले स्थान नपाएको बताए।

    ‘पार्टीका भ्रातृ र शुभेच्छुक संस्थाले पूर्णता नपाउँदा काम गर्न निकै गाह्रो भइरहेको छ। क्याम्पस, जिल्ला, प्रदेश र केन्द्र सबै ठाउँमा भ्रातृ र शुभच्छुक संस्थाको नेतृत्व जाम छ’, उनले भने, ‘युवासँगै थुप्रै व्यक्ति बाहिर रहेकाले स्वतन्त्रहरू सलबलाउन थालेका छन्। राजनीतिप्रतिको वितृष्णा बढ्दो छ।’

    उनले पदाधिकारीसहितको पूर्ण आकारको कमिटी बनाउन पार्टी नेतृत्व पङ्क्तिको गम्भीर ध्यानाकर्षण गराउन चाहेको बताए। यसो गर्ने मात्रै नयाँ परिस्थितिसँग प्रतिस्पर्धा गर्न सकिने महरको दाबी छ।

    सबै भ्रातृ र शुभेच्छुक संस्थाको पूर्ण कमिटी बनाउँदा १५ हजार मानिसले जिम्मेवारी पाउने महरले बताए। जिम्मेवारी प्राप्त गर्दा मानिसको सक्रियता बढ्ने भएकाले गठबन्धनबिनै पनि पार्टी प्रतिस्पर्धा गर्न सक्षम हुने महरको भनाइ छ।

    ‘जिम्मेवारी विहीनले के माग गर्ने? कसलाई काम लगाउने? अहिले धेरै युवा रनभुल्लमा छन्। अब यो परिस्थितिको अन्त्य हुनुपर्छ। पार्टीलाई जीवन्त पार्न भ्रातृ संस्थालाई पूर्णता दिनैपर्छ,’ महरले भने। उनले पार्टीलाई सशक्त र पुनर्ताजकी बनाउन सञ्जीवनी बुटीको काम गर्ने बताए। उनले गाउँगाउँसम्म भ्रातृ संगठन पुग्दा जनताको घरघरमा पुगेर पार्टीको मिसन र भिजन बुझाउन सहज हुने बताए।

    ‘नेविसंघ कांग्रेसको मुटु हो। युवासंघ तरुणहरूको ऊर्जा हो। सांस्कृतिक संघ कलाकर्मीहरूको संगठन हो। यस्तै अन्य थुप्रै संगठनले पूर्णता पाउन सकेका छैनन्। ठूलो समूह जाम भएर बसेको छ। जसले पार्टीका गतिविधिमा ठूलो असर गरेको छ’, महरले भने। उनले तुरुन्त भ्रातृ संगठनलाई पूर्णता नदिए पार्टीप्रतिको युवा आकर्षण घट्नेप्रति नेतृत्व गम्भीर हुनुपर्ने बताए।

    प्रतिक्रिया
    नयाँ अपडेट
    धेरै पढिएको
    अन्य समाचार